MBUNGE KAMONGA – NILETEENI KIONGOZI ANAYETOKANA NA CCM

Ikiwa ni mwendelezo wa Kampeni za Uchaguzi wa Serikali za Mitaa Vijiji na Vitongoji katika maeneo mbalimbali kote nchini, kamati ya Siasa ya Chama Cha Mapinduzi pamoja na Sekretarieti Wilayani Ludewa Mkoani Njombe imetawanyika katika maeneo mbalimbali ya Wilaya hiyo Ili kuwaombea kura za ndiyo wagombea wanaotokana na Chama hicho.

Miongoni mwa wajumbe hao ni Mbunge wa Jimbo la Ludewa Joseph Kamonga ambaye amepita katika Kata mbalimbali za ukanda wa mwambao mwa ziwa Nyasa na kupokelewa vizuri ambapo katika mikutano ya hadhara aliwaomba wananchi kumchagulia viongozi wanaotokana na Chama hicho badala ya Chama pinzani Ili waweze kushirikiana vyema katika kuleta maendeleo.

” Ndugu zangu Serikali ya CCM kupitia Viongozi mbalimbali wakiwemo Madiwani, Mimi mbunge wenu na Rais wetu Dkt. Samia Suluhu Hassan tumefanya mambo mengi sana ya maendeleo katika maeneo yenu na bado tunaendelea kuleta, hivyo mkituletea viongozi ambao hawaendani na chama cha CCM mjue mtakuwa mmemuweka mtu atakaye vuruga maendeleo hayo”.